فى أحدث حلقات برنامج «المواطن سعيد» تقديم الكاتب الصحفي أحمد سعيد، والتي نُشرت أمس الاثنين 30 أكتوبر 2023 عبر منصة “يوتيوب” تحت عنوان “فشل الاجتياح.. كيف نجحت المقاومة فى صد الاجتياح وطرده من سواحل غزه”
اليومين اللى فاتو الجيش الاسرائيلي نشر فيديو لاتنين من جنوده وهما رافعين علم اسرائيل فوق بيت من بيوت قطاع غزه.. وكتب على الفيديو ان القوات الاسرائيلية مش بس نجحت فى دخول قطاع غزه.. دى كمان بترفع العلم الاسرائيلي فوق أسطح المبانى.. وهنا سؤال مهم.. هى اسرائيل فعلا نجحت فى تنفيذ الاجتياح البرى لقطاع غزه؟.. ولو فعلا نجحت.. فين قوات أبوعبيده وفين المقاومة وفين كتائب القسام؟.. ازاى سابوهم يقتحمو القطاع ويرفعو العلم الاسرائيلي؟.. وازاى بعد كل ده عنوان الحلقة بيقول ان الاجتياح فشل؟.. والأهم من كل اللى فات.. هى ايه حكاية لعنة العقد الثامن اللى هدد بيها أبوعبيده.. وايه حكاية تاريخ النبى يوشع بن نون اللى هدد بيه رئيس الوزراء الاسرائيلي؟.. أقولك الله ينور عليك.. هى دى الاسئلة المهمه تعالا بقى نجاوب عليها
يقول الكاتب احمد سعيد فى حلقة من حلقات المواطن سعيد : لو حضرتك متعرفش فاسرائيل بدات من كام ساعه فى إغراق شبكة أنفاق حماس بماية البحر.. جابت مضخات مايه من ألمانيا وأمريكا وبتسحب ماية البحر وبتضخها فى الانفاق علشان تغرقها.. لكن قبل ما احكيلك اللى بيحصل فى غزة.. خلينى أقولك ان فى الوقت اللى حضرتك مشغول فيه باجتياح غزة والحرب هناك.. الجيش الاسرائيلي بينفذ عملية عسكرية فى الضفة الغربية دلوقتى.. اسمها التهجير الصامت.. العملية دى بتتنفذ دلوقتى.. طيب هو يعنى ايه التهجير الصامت؟.. يعنى بيطرد السكان الفلسطينيين من أراضيهم وبيوتهم علشان يضم الضفة الغربية كلها.. حضرتك تقولى ازاى.. مش حل الدولتين واعلان دولة فلسطين وفقا لصفقة القرن، اللى أمريكا نفسها عايزه تنفذها.. بتقول ان الضفة الغربية دى هتكون جزء من دولة فلسطين الجديدة؟.. أقولك الله ينور عليك.. وهنا خلينى انا اسألك سؤال.. منين امريكا واسرائيل بيوعدو قادة الدول العربية بحل الدولتين واقامة دولة فلسطين.. ومنين اسرائيل استغلت الحرب فى غزة وبدأت تهجر سكان الضفة الغربية وتضم أراضيها؟.