يقدم الدكتور مأمون عمرو منصور ،أخصائي الاطفال وحديثي الولادة والمبتسرين روشتة طوارئ للاطفال
ويقول دكتور مأمون على صفحته الشخصية على موقع التواصل الاجتماعي فيسبوك
“كتير من الأمهات و خصوصا أمهات لأول مرة بتخاف تسافر او تقضي اجازة حلوة مع ابنها خايفة يحصلوا حاجة و هي بعيدة عن دكتورها
طيب تعالوا نتعلم كام حاجة عشان تقدري تتصرفي صح وقت الطوارى لحد ما تلجأي لاستشارة الطبيب
اولا: الجروح
لو حصل وابنك اتجرح اضغطي على الجرح جامد لتوقف النزيف و بِعد كده اغسليها بمياه جارية لو النزيف توقف و الجرح مش عميق يبقى مش هتعملي حاجة غير انك هتطهري الجرح ببتادين و تغطيه ببلاستر اما لو الجرح عميق او النزيف مبيقفش يبقى الأفضل تتوجهي لأقرب طوارى.
ثانيا: الحروق
لو الحرق حصل لا قدر الله بسبب مياه ساخنة او سطح ساخن الحل السريع هو المياه الجارية على المنطقة المصابة و الأفضل تكون ساقعة ثم بعد كده ابدأي بكريمات الحروق زي ميبو و متغطيش الحرق او ممكن بشاش فازلين اما لو الحرق منطقته كبيرة او قريبة من الوجه او الرقبة او الأعضاء التناسلية يبقى الأفضل تتوجهي الى اقرب طوارئ.
ثالثا: نزيف الانف
بيحصل كتير و خصوصا في وقت تغيير الفصول او في الحرارة العالية او مع المجهود الجامد او ممكن يحدث صباحا عند الاستيقاظ ده بيبقى ضعف في الشعيرات الدموية خلي وجه الطفل لأسفل واضغطي جامد على الانف حتى يتوقف النزيف و ممكن نزود فيتامين سي اما لو اتكررت اكتر من مرة الأفضل العرض على طبيب و ممكن يوصفلك امبول تحطيه في الانف وقت النزيف.
رابعا: السقوط من اعلى
اكتر مكالمة بتجيلي دايما و تكون الام مرعوبة هي ان ابنها وقع من على السرير او الكنبة طيب لو حصل نخاف من ايه نخاف لو الطفل رجع اكتر من مرة او غاب عن الوعي او ظهرت تشنجات لا قدر الله ساعتها الطفل بيروح اقرب طوارئ لعمل أشعة مقطعية طيب لو محصلش ولا حاجة من اللي قولته ده نفضل مراقبينه ٢٤ ساعة لو محصلش حاجة يبقى مفيش مشكلة خلاص.
خامسا: التشنجات الحرارية
ودي بتحصل دايما مع ارتفاع درجة حرارة الطفل و بيبدأ يتشنج طيب اول حاجة لازم ننزل درجة الحرارة والأفضل تحت المياه الجارية شاور لحد ما الطفل يفوق و بعد كده نستعمل خافض حرارة الأفضل لبوس باراسيتامول لان بالفم الموضوع هيبقى صعب و نكمل كمادات و ساعتها الأفضل التوجه لأقرب طوارئ للاطمئنان على علاماته الحيوية.
سادسا: القئ المستمر
و ده اللي قصدي بيه المستمر يعني اكتر من مرة ورا بعض و بيحصل مع الاكل ومع المياه و حتى من غير اَي حاجة الأفضل نمنع على الاكل والشرب في الوقت ده لمده ساعة او ساعتين و لو الترجيع موقفش الأفضل نبدأ نديله حاجة توقف القئ بالحقن عضل زي الزوفران او الدانست و تبقي سائلة دكتورك على الجرعة المظبوطة حسب الوزن و بعدها برده مياكلش ولا يشرب الا بعد ساعة و يأكل مقرمشات ثم سوائل لو الترجيع لسة مستمر يبقى يتوجه لأقرب طوارئ.
سابعا: بلع جسم غريب
ده بيحصل طبعا مع الاطفال الصغيرين لو حصل اختناق بنقلب الطفل وجهه لأسفل ثم وتحتضنه من الخلف و نضغط على بطنه لاعلى لطرد الجسم او نخبط شوية على ظهره ووجهه لأسفل برده بس بعد كده لو الاختناق انتهى يبقى تمام اما لو الطفل بلع الجسم الغريب بنراقبه من ٢٤ الى ٤٨ ساعة و نعمل أشعة لتتبع المسار في الجهاز الهضمي اما لو الاختناق مستمر يبقى التوجه السريع للطوارئ أفضل حل.
على الامهات وقت الطوارئ ان يكونوا على قدر من انظباط النفس وحسن التصرف لان الدقائق بتفرق فالافضل تتصرفي بعقل وحكمة و بعدها الجأي لاستشارة الطبيب
